أنا بشر

الأديبه الشاعره : نـهى حـمــزه
أنا بشر من دنيا البشر 
من دنيا البشر
مخلوقه جوايا نبض
مش حتة حجر
جوايا رضى وبرضه جوايا ضجر
باحب واكره وأخاف وأقلق
مقضياها سكات
بس ساعات بازهق
ماشيه فى طريق العمر
أدخل فى حاره سد
تردنى ما اترد
وكتير كتير باحتار على المفرق
بارجع وباتقدم
أعلم وبأتعلم
باسكت وباتكلم
أصدق وأتصدق
بأقول كلام العقل
وساعات كلام أحمق
تساومنى نفسى والنفس أماره
تلعب بقلبى وتنادى ضعفى
وأخرتها بخساره
وخدانى لقدرى كأنى آله بإشاره
والدنيا رايحه وجايه
سايره وسياره
شويه من لمعانها مغريه
وشويه أنا من  الفرح منسيه
ما أنا بشر من دنيا البشر
تصرخ ما تصرخ خلى صرختك جواك
دنيانا فيها النجا
زى ما فيها هلاك
وربى قال إنى مخلوقه ف كبد
وآهى بعد ما بضيق بيجى فيها الفرج
ومنه سبحانه عون ومدد
والحول والقوه منه سند
بقلمى : 
#نهـى_حـمــزه