الـمـطبخ تقدمـه "صابرين متولي": الكيكه بطريقة سهله ..وبخطوات عمليه..من مطبخ  دينا احمد

الكيكه من الحاجات اللي بتسبب ازمه لستات كتير  انها مش بتضبط وطلعت هابطه او مش حلوة ..النهاردة هنقدملكم طريقه الكيكه ودي من اكتر الطرق الناجحه جدااا جداااا لو اتبعتوا الطريقه بالضبط اوعدكم هتعملوا كيكه الناس كلها بتحلف بيها تعالوا نشوف المقادير

المقادير...   
اسهل حاجه نحفظ بيها مقادير الكيكه دى هي اربعه تلاته اتنين واحد ....وهنعرف ليه دلوقتي

4 بيضات 
3 كوب دقيق 
2كوب سكر
1كوب ذبدة او زيت وهنا انا بحب احط نصف الكوبايه ذبدة ونصها زيت لأن الزيت بيدينا كيكه طريه وهاشه جدااا
رشه ملح 
فانيليا 
ونقطتين خل و هنعرف ليه في الطريقه 
1 باكو بيكينج باودر او كيك شيف 
وطبعا هنا هنحتاج 1 كوب مادة سائله ودي ممكن تكون لبن او عصير برتقال لو عاوزينها بالبرتقال و ممكن كوبايه نسكويك او اي عصير

الطريقه ......

اول حاجه ممكن في عمايل الكيكه نستخدم الخلاط او المضرب الكهربائي او الهاند بلندر او حتي ممكن المضرب السلك اليدوي بس بيكون محتاج مجهود 
نيجي بقه للمهم هنحط اولا السكر و الذبدة ونضربهم كويس جدا وبعدين هنحط البيض واساسي معاه الفانيليا ونقطه الخل وليه هنا بقه بنحط الخل لأنه بيشيل زفارة البيض تماما و كمان مهم جداا عشان الكيكه تكون مرتفعه وهشه   ونضرب كويس جدااا و نحط الكوبايه السائله اللي هي اللبن او عصير البرتقال .....ولحد هنا دور الخلاط او المضرب انتهي 
هنحط الخليط كله في بوله او طبق وننزل عليه بالدقيق اللي عليه رشه الملح وكيس البيكنج بودر و هنقلب بالمضرب اليدوى او بالسباتيولا السيلكون بس هنقلب في اتجاه واحد عشان منخرجش الهواء اللي دخلناه عن طريق الضرب يعني هنضرب بس لحد ما الدقيق يختفي في الخليط 
هنجيب صنيه ونبطنها بالدقيق والذبدة كويس ونحط الخليط فيه و ندخلها علي طول علي فرن ساخن من قبل كدة علي درجه حرارة 180 ومنفتحش عليها قبل نصف ساعه نختبر سواها بأننا نحط السكينه او خله الأسنان في نصف الصنيه لو طلعت نضيفه ومفيهاش اي علامات للكيكه يبقي تمام الكيكه استوت نطفي الفرن ونسيبها 5 دقايق وبعدين نطلعها تبرد ونقطعها ...
والف هنا ❤❤❤❤
تكات لازم نعملها للحصول علي كيكه ناجحه :
●الفرن نسخنه قبل ما نبتدي في اي خطوات
●كل مكونات الكيكه تكون بدرجه حرارة المطبخ 
●مننساش نقطه الخل مهمه جدا جدا
●الكيكه اول ما نحطها في الصنيه تدخل الفرن فورا
●منفتحش عليها قبل نصف ساعه حتي لو شمينا ريحتها
●بعد ما نطفي عليها منطلعهاش علي طول عشان متاخدش صدمه هواء و تهبط