تحية ليك ياأبن بلدي بقلم مصطفى سبتة

الأصيل ملوش فى الزمان ده ابدا مثيل
فلاح بلدنا الآصيل ملوش مثيل فى الغرب
واصل ليله نهاره كأنه فـ ساعه حرب
الصبح يصبح بسرعه يصلي الفرض
ويحمل فاسه فـ إيده ويهمس يقول يارب
ماشي فـ طريقه متوكل على الرحمن
وهو ماشي يسبح سبحانك فالق النوى والحب
تلاقيه فـ ساعه فرح ، تلاقيه فـ ساعه كرب
حياته كفاح وعرق وجهد متواصل
أصيل وطبعه الجد معرفش فـ حياته اللعب
لا شمس النهار تحرقه ولا برد يأثر فيه
يتحدى كل الظروف يتحدى كل الصعب
تحيه ليك يابن بلدي ، يابن الهرم والنيل
لك منا الف تحيه لك منا كل الحب
فلاح بلدنا الآصيل راح غيطه وقال موال
ونادى على ابنه الوحيد تعالى ياعبد العال
اقولك كلام ياولد قالوه فى الآمثال
الآرض عرض ياولد بلاش نقاش وجدال
تضرب ارضك بفاسك خيرها يرد عليك
وآخر نهارك تروح تنام خلي البال
اقولك نصيحه صريحه ليك ووأولادك
أرضك حافظ عليها وورثها للآجيال
وخللي عندك عزيمه تهد بيها جبال
وخليك صابر جلد والنيه بالآعمال
وأختار صاحبك يصحبك لوجه الله
اياك تماشي ردي والا خسيس محتال
وان مره حبيت ياولد والا قلبك مال
اختار صبيه مليحه أصيله بنت حلال
تملا عليك دنيتك وتشيل عليك أحمال
وان جبتلك ولد يبقى أصيل الخال
وخللي عندك اراده وأيمان قوى بالله
تبقى القناعه شعارك كنز بدون أموال
سلح ولادك ياولد بالعلم والآيمان
العلم نور وهدايه وفيه صلاح الحال
حب الوطن يا ولد اسمى معاني الحب
قالها جدي وجدك وغنوها فى الموال