حين تنهض الحكايات من تحت الركام

بقلم/نشأت البسيوني 

حين تنهض الحكايات من تحت الركام نلاقي روح الانسان واقفه قدام مرايه واسعه مرايه ما بتلطفش الحقيقة ولا بتخدعها مرايه بتفكرنا ان العمر مش مضمون ولا الحد اللي يعوضنا مضمون وان اللي يروح ما يرجعش واللي يكسر ما يتصلحش واللي يعاملنا بنقص ما ينفعش نرفع له قدر ولا نديله مساحة تزيد عن حجمه
في بداية كل سنة بنقف قدام نفس السؤال هنكمل ازاي هنمشي 

فين وهنفتح باب جديد ولا هنقفل باب قديم بس الحقيقة ان كل الاجابات موجودة جوانا مش برا جوانا قانون بسيط قانون نجاة قانون بيقول اللي يمشي ما يرجعش والوحش ما ينفعشى والناقص ما يشجعشى والجعان ما بيشبعشى قانون يحمي الروح من الاستنزاف ويحمي القلب من اللي ما يعرفش قيمته ومع كل لحظة وعي بنكتشف ان الناس مش كلها رزق في ناس ابتلاء وفي ناس 

اختبار وفي ناس مجرد ظل بيمر وما يسيبش أثر وفي ناس لو فضلنا وراها هتسحب مننا نور عقلنا وراحة قلبنا علشان كده بنقرر نقف ونقول كفاية ونختار نفسنا قبل أي حد ونشيل من طريقنا كل اللي بيقلل من قيمتنا احنا داخلين على زمن ما بقاش يسمح بوجع مجاني ولا بعلاقة نص نص ولا بضحكة شكلها حلو وجواها غياب ولا بقرب بياخد وما بيدي شي ولا بوجود بيمحي وجودنا احنا 

داخلين على زمن اللي يضايقنا يخسرنا واللي يزعلنا نسيبه واللي يستهين بينا نطلعه برا المشهد من غير ما نرجع نبص انتم من سكه واحنا من سكه احنا اتعلمنا من الكسرة مش من الرفاهية اتعلمنا من السقوط ازاي نقوم ومن الهجر ازاي نرجع لنفسنا ومن الندم ازاي نفهم قيمتنا ومن الوحدة ازاي نتسند على روحنا مش على حد تاني
ويلا بينا نعيش علشاننا نعيش من غير انتظار ولا مجاملة ولا خوف 

من خسارة حد ما كانش ليه مكان ثابت في حياتنا نعيش بقلب خفيف وعقل صاحي وروح ما بتسمحش لحد يعتم نورها نعيش ونسيب الأيام تقول مين اللي كان وجوده نعمة ومين اللي كان وجوده عبء واحنا مش واخدين بالنا سيبونا ننور بالنا ننوره بالعقل مش بالعشم ننوره بالاختيار مش بالصدفة ننوره بالناس اللي بتبني مش اللي بتهد وبالخطوات اللي بتودينا لقدام مش اللي بترجعنا ورا 

ننوره بحكايات اتولدت من تحت الركام واتلملمت من بين التعب والخوف والوجع واتقفلت على معنى واحد بس ان الانسان لو ما وقفش لنفسه محدش هيوقف له