حين يسقط الإنسان في صمت ذكرياته

بقلم/نشأت البسيوني 

في وقت معين من العمر بييجي عليك يوم مش بسبب خسارة ولا فراق ولا ضغوط لا ده يوم غريب بتحس فيه إن ذاكرتك فجأة بقت تقيلة كأنها قررت تنزل عليك كلها مرة واحدة الذكريات اللي كنت فاكرها هدية بتلاقيها في لحظة بتتحول لحمل الذكريات اللي كنت فاكرها هتنقذك من الوحدة تلاقيها هي أكتر حاجة بتوجعك الذكريات اللي كنت شايفها وطن تلاقيها بقت بلد مهجور مفيهوش 

غير صوتك وإنت بتنده على حد ما بقاش موجود تلاقي نفسك واقف قدام صور ما كنتش فاكر إنها قادرة تكسرك وتلاقي تفاصيل صغيرة بتوجع أكتر من الخسارات الكبيرة زي ضحكة راحت وما رجعتش باب اتقفل ومش هيتفتح تاني كلمة اتقالت ومكانتش مقصودة لكنها حفرت جواك لحد النهارده وتحس إنك لأول مرة فاهم إن اللي بيكسر الإنسان مش اللحظة اللي حصلت فيها الحاجة 

اللي وجعته لكن اللحظة اللي يدرك فيها إن اللي راح مش هيرجع وإن اللي اتغير ما ينفعش يرجع زي الأول ومع إن الذكريات بتوجع لكنها برضه بتنور بتفكرك إنك عديت من حاجات ما حدش يعرف يتخيلها بتفكرك إنك قومت وقفت وكملت حتى لما كنت ماشي بنص روح ونص حلم وكل اللي فاضل منك كان عافر إنه ما يقعش الذكريات بتكشف لك شكل الإنسان اللي بقيت عليه من غير 

أقنعة من غير بطولة من غير كلام كبير بتوريك جرحك اللي استخبيته ودمعتك اللي ما خليتش حد يشوفها وخوفك اللي كنت بتنكره حتى قدام نفسك وساعات الذكريات بتفاجئك بحاجة أغرب إنها تكون أرحم من الواقع ذاته لأنك رغم كل اللي شفته ولسه شايفه تلاقي نفسك بترجع لشريط قديم علشان تحس إن في نسخة منك كانت لسه صافية لسه بتضحك من قلبها لسه مصدقة 

الناس لسه مش شايلة كل الوجع ده جواها نسخة ما تعرفش إنها هتكبر وتتعلم بالطريقة الصعبة لكن وسط المعركة دي كلها بينك وبين اللي فات يظهر السؤال اللي يحدد أنت مين وعايز إيه هل هتفضل أسير لصور فاتت ولا هتبص قدام وتقول لنفسك كفاية هل هتفضل تدور على اللي ضاع ولا هتمسك في اللي باقي هل هتستسلم لصوت الندم ولا هتسمح لصوت جديد يولد جواك صوت 

يقول إن الماضي مهما كان تقيل مش أكبر من إنك تعديه وإن الوجع مهما كان شديد مش أبدى من قوتك وإن الذكريات مهما قست عليك مش هتقدر توقفك طول ما فيك نفس ولسه عندك خطوة لقدام وساعتها بس هتعرف إن الذكريات مش لعنة ولا رحمة الذكريات معركة وانت اللي بتحدد نهايتها مش هي اللي بتحدد نهايتك