دكتوره سناء شريف مساعد وزيره التعاون الدولى تكتب 

تحليل مرعب لصورة إقتصادية

التضخم في تركيا يقفز الان الي ٧٠٪؜

عادة يتم علاج التضخم ( بصورة مؤقته ) من خلال رفع معدل الفائده في البنوك زي ما مصر عملت و رفعت الفائدة الي ١٨٪؜ و زي ما امريكا ما عملت امس و رفعت الفائده نصف بالمائه

طيب هل العلاج من خلال رفع سعر الفائدة كافي 

الاجابة بوضوح شديد لا طبعا 

ليه بقي

لان فائدة البنوك اسمها معدل الفائده الاسمي

Nominal interest rate  

فيه معدل تاتي مهم انك تعرفه اسمه معد الفائدة الحقيقي

Real interest rate  

يعني ايه الكلام ده 

دلوقتي لو انا معايا مبلغ و قدرة مليون جنيه و اودعته في البنك بفائدة ٢٠٪؜ في نهاية السنه حيكون معايا مليون و ٢٠٠ الف 

طيب المليون دي كانت يوم ما اودعتها تكفي لشراء شقه بعد سنه نتيجة للتضخم في اسعار الحديد و الاسمنت و العماله و غيره الشقه اللي كانت بمليون اصبحت بمليون و ٣٠٠ الف جنيه 

يعني التضخم نسبتة كانت ٣٠٪؜ لان الاسعار زادت ٣٠٪؜

يبقي انا في نهاية العام كسبت لما اودعت فلوسي في البنك؟

طبعا لا

لان معدل الفائدة الحقيقي بالسالب

يبقي معدل الفائده الحقيقي يساوي

معدل الفائدة الاسمي مطروحا منه معدل التضخم

يعني في المثال السابق انا خسرت ١٠٪؜ مش كسبت٢٠٪؜ فائده 

و بالتالي اذا كانت تركيا عاوزه تعالج التخضم بزيادة معدل الفائدة في البنوك يبقي لازم تدي الناس فائدة اعلي من ٧٠٪؜

عشان تبقي الفائده الحقيقة موجبه 

  طيب و الدوله التركية ح تدفع للمودعين الارقام الخاصه بفلوسهم و الفوائد اللي عليها دي منين

غالبا ح تطبع فلوس بدون انتاج حقيقي يبرر هذا الطبع 

يقوم التضخم يرتفع اكتر لان الناس معاها فلوس كتير و مافيش بضاعه 

فتضطر ترفع سعر الفائده تاني و تطبع تاني و هكذا 

و الناس للاسف قيمة ثروتها تصبح لا قيمة لها لان ما يملكونه من نقود هي مجرد ورق بلا قيمه

امريكا ذاتها مش بعيد عن الكلام ده 

لان التضخم الفعلي في الشارع الامريكي وصل الي ١٠٪؜ و ده بالنسبه لهم و الدولار كعمله رقم فظيع

فرفعوا سعر الفائده بنصف بالمائه و طبعا ده غير كافي بالمره لانه عشان يبقي معدل الفائده حقيقي لازم تزيد عن فائدة البنك عن ١٢٪؜ 

و لمًا يبقي امريكا فيها تضخم ١٠ ٪؜ معني ذلك ان الدولار بيفقد كل سنه ١٠٪؜من قيمته 

طب ليه احتفظ بدولارات بتخسر و احطها ضمن سلة الاحتياطي بتاعي لذلك العملات الاخري زي اليوان الصيني و الروبل الروسي و الروبيه الهندي بيمثلوا تهديد للدولار 

طيب البورصه الامريكية بيحصل ايه فيها

امس لما الفيدرالي الامريكي -يعني زي البنك المركزي عندنا - رفع الفائدة الي نصف بالمائه فقط و كان متوقع انه يرفعها الي ٣٪؜

السوق ارتفع بصوره كتيره جدا اكتر من ٩٠٠ نقطه

ليه؟ لان البورصه المنافس لها في الاستثمار هو البنك 

و كل البنك ما يزود الفائده الناس ح تسيب البورصه و مخاطرها و تحط فلوسها في البنك 

النهارده المؤشر بتاع البورصه الامريكي ( الصوره الثانيه ) بدا ينزل تاني و يفقد كل مكاسب امس 

طيب عاوز تقولى ايه يا دكتوره

عاوزه اقول ان السوق الامريكي اكبر من اسواق العالم مجتمعه و لو وقع كل اسواق و بورصات العالم ح تقع معاه

طيب هو حيقع؟

لو النهارده و بكره كمل الاتجاه النازل بتاعه يبقي تأكد الاتجاه النازل 

طيب اعرف ازاي كمستثمر بسيط انه ح ينزل  

شوف انا علمت لك علي الرسمه التالثه - الاخيره باربع دوائر 

ايه الدوائر دي

الدائره الاولي اعلي قمه وصل المؤشر الامريكي خلال ٢٠٢٢

و بعدين جاءت احداث روسيا و اوكرانيا فنزل المؤشر 

و بعدين طلع تاني و عمل قمه ثانيه جديده لاحظ انها اقل من القمه الاولي ثم قمه ثالثه اقل من الثانيه ثم قمه رابعه اقل من الثالثه يبقي ده هو الاتجاه النازل 

لذلك وجهة نظري البسيطه لو تم كسر حاجز ٣٠ الف نقطه هنا نقدر نقول ان الازمه بدأت بالفعل و ربنا يستر

طب الحل 

تاني و ثالث هو التقشف حكومه و شعبا و الانفاق في الانتاج و البعد عن الرفاهيات و القابل للتاجيل يؤجل 

وايضا الاقتراض طويل الاجل لو امكن 

و تأجيل السداد لان ما يحدث حولنا هو ظروف قهريه اسبابها الدائنين انفسهم امريكا و روسيا و اوربا و الصين 

لقد ثبت ان كورونا بفعل فاعل

 و الحرب و توقف الانتاج و تعطل سلاسل الامداد كان يمكن تجنب ذلك عالميا لو ان الكبار وافقوا علي ذلك الا انه لم يحدث 

كما ان التضخم سببه هو قيام امريكا و الدول الكبري بالطبع تحت مسمي التيسير النقدي و نحن ندفع ثمن ذلك الان

 مطلوب اعداد فريق اقتصادي و مالي و قانوني محترم كفيل باعداد مذكره لاسقاط ديون الدول الفقيره كلها لانها كانت المفعول بها و لم تكن فاعله في هذه الاحداث 

اللهم احفظ مصر و كل دول العالم المظلومه و ندعوك بان يعم السلام و تظهر الحقوق عاجلا غير اجل