ذاكرة الطريق

بقلم/نشأت البسيوني 

ذاكرة الطريق دايما مليانه بحاجات احنا نسينا اننا عدينا عليها وبحدوتها اللي بدأت من غير ما نقصد وانتهت واحنا مش واخدين بالنا الطريق نفسه بيشيل كتير من اسرارنا من اول خطوه مشيناها واحنا فاكرين اننا عارفين الاتجاه لحد آخر لحظه وقفنا فيها محتارين بنسأل نفسنا هو احنا رايحين لفين وليه اللي جوانا ساعات يسبقنا وساعات يتأخر عننا في الطريق بنلاقي حاجات كتير 

بتتغير جوانا حاجات كنا فاكرين انها ثابتة ومش هتهز وبنكتشف ان اقوى حاجه ممكن يملكها الانسان هي مرونته واستعداده يبدأ من جديد حتى لو اتكسر حتى لو خسر حتى لو فيه جزء جواه اتألم اكتر من اللازم الطريق بيعلمنا نتعامل مع الخساره زي ما بيعلمنا نحتفل بالمكسب بيعلمنا نفهم البشر ونقرأ الضحكه اللي مش دايما بتكون صدق ونعرف الوجع اللي مستخبي في كلام بسيط ونكتشف 

ان مش كل اللي بيبان حقيقه ولا كل اللي في القلب بيتقال الطريق بيختبر قلوبنا وبيختبر صبرنا ولما نحس اننا تعبنا نلاقي دايما علامه صغيره بتقول لنا كمل مفيش حاجه بتقف عند لحظه واحده ومفيش حزن بيعيش للأبد زي ما مفيش فرح بيدوم على طول المهم ان الانسان يفضل ماشي مهما حصل يفضل شايل جواه يقين بسيط ان كل حاجه هتاخد مكانها في وقتها وان كل تعب هيلاقي 

لحظه يرتاح فيها وان كل اللي ضاع هيتعوض بشكل ما وفي وقت ما ومع كل خطوه جديده هنفهم اكتر عن نفسنا وهنعرف قد ايه الطريق ده رغم قسوته كان دايما بيشكلنا ويقوينا ويعلمنا ان احنا اقوى مما افتكرنا وان اللي جاي مهما كان غامض دايما عنده فرصه يبقى أجمل بكتير من اللي فات