شعر| نتيجة الامتحان

 
**************
صحيت على  زيطه وزمبليطة 
ولمة كبييرة متلمتش من زمان
جلت تلجاها دي ليلة.              
أوزفه في بيت فلان
فرشي من نومي شكى.                 
جالي جوم. جوم يانعسان 
جمت.  أجرر أنا في رجلي.       
مالي كدا  وخمان كسلان 
لجيت الزيطة ف صحن دارنا 
خلق يامااااا رايحه جايه 
مبدورين  في كل مكان
بقيت  أسأل إيه ياخلق
زفه مين اللي حدانا 
ولا أنا  بيني حلمان؟!
رحت لابوي اسأله واماي 
 وولدي حسان
وجارنا نجيب والست حسنة
وإبتهال وأختى احسان
مالقيت رد يكفي حيرتي
صوتي راااااح صوتي راح 
كما الدخان 
 كني وسطيهم  خيال
صورة باهته ع الحيطان
العيون بتجول كلام
والوشوش فيها نكران
زعجت أنا بعلو الصوت 
صاحي أنا  ولا غفلان 
مادريت بحالى غير وأنا
كما الوليد جاها  عريان
مادريت بحالي غير وأنا 
بصبوب المي بقيت غرقان
جابوا لي توب كنه جديد 
حطوني فيه بجيت زهلان
بصيت لصورتي جوه عيونهم  
لجيت خيال..... لجيت خيال
مش كيان 
إجدامي كنيها  صخر
و متلجم فيا اللسان
حتى الإدين متغلغلة 
مسلسلة بحجر صوان   
صارت اكتافهم  لي ارض
واستسلمت وأنا خزيان 
حسيت الزمن ساعتها 
سم عقاربه كما التعبان 
حسيت الزمن ساعتها 
نياب لوحش كان جعان
جي ينهش باقي عمري 
ولاجادر إني اوجفه
ولا أجول غيتوني أناغلبان 
طب كنتوا جولوا اعمل حسابي
أحوش لنفسي هبابة إيمان
واشتري لي فدن خير 
يطرح خير مش عصيان
واعمل لي طريق بصدقة
امشي فيه ساعة مايؤن الأوان
طب كنتوا جولوا إنها ليلتي  
و هيفرجوني أحباب  خلان  
وف لحظة..... لقيتني جتة  
جاري  الحصي وعضام انسان 
طاجة النور بقت ضلام 
راحوا ... راحوا وسابوني 
 وحدي أواجه اللي كان
صار بيني وبين النور
سد عالي من غرور
كنت أنا فيه غرجان 
لقيت الكل متلهي في حاله 
نافر   ..نافر من ريحة المكان
مبجاليش غير ساعة واحدة 
ويبتدي زحف الديدان 
مبقاليش من صوتي غير
رعشة قدام الرحمن
لا عاد زيطة ولا زمبليطة
ولا غش ولا كتمان  
دلوج حان المعاد 
معاد  نتيجة الامتحان 
********************
مايسة أمام