على حافة آخر نور

بقلم/نشأت البسيوني 

على حافة آخر نور في يوم من الأيام هتقف قدام نفسك وقفة ما حدش يقدر ياخدها مكانك وقفة بتبان عادية لكنها في الحقيقة معركة بين قلبك اللي اتوجع كتير وروحك اللي لسه بتدور على بصيص أمل يخليها تكمل الطريق اللي ما حدش فهمه غيرك
على حافة آخر نور بتحس إن الدنيا بقت ضيقة رغم إنها واسعة والناس حواليك كتير رغم إن قلبك فاضي والخطوات ماشية لقدام 

رغم إن روحك واقفة في نفس النقطة اللي اتكسرت فيها أول مرة ويمكن ألف مرة بعدها ومحدش أخد باله على الحافة دي بتفتكر كل اللي عدى عليك الكلمات اللي جرحتك والبيوت اللي دخلتها مطمئن وخرجت منها مجرد ظل والوجوه اللي افتكرت إنها ضهرك وطلعت أول ناس يبيعوك وقت ما كنت محتاج بس كلمة مش سند ولا حاجة كبيرة كلمة تتقال من قلب صادق مش من لسان حافظ دوره

على حافة آخر نور بتفتكر اللحظات اللي كنت بتضحك فيها وإنت من جواك منهار اللحظات اللي كنت فيها بتحاول تثبت إنك بخير عشان محدش يشوف حجم الوجع اللي ساكن وراك وبتفتكر صبرك اللي كنت شايفه قوة واللي اتضح في الآخر إنه كان محاولة يائسة إنك ما تقعش وأنت وقع من زمان على الحافة دي بتيجي اللحظة اللي بتسأل فيها نفسك بصوت عالي أنا ليه لسه واقف رغم كل اللي 

راح كل اللي انكسر كل الأحلام اللي اتدفنت والنفوس اللي اتغيرت والوعود اللي اتقالت في يوم بدفا واتسابت تبرد لحد ما ماتت وراحت لحالها لكن الغريبة إنك بتلاقي جواك حاجة واحدة لسه عايشة رغم كل الموت اللي مر عليك بتلاقي شرارة صغيرة جداً مش بتبان غير في عتمتك شرارة بتقول لك لسه في منك شيء ما ماتش شيء لسه عايز يعيش شيء بيقول لك إنك محتاج بس وقت 

مش أكتر وإن الحافة دي مش نهاية زي ما افتكرت وإن آخر نور دايماً بيطلع بعده فجر ما كانش على بالك على حافة آخر نور بتتعلم إنك مش لازم تبقى قوي كل الوقت إنك أوقات لازم تسمح لقلبك يبكي ويضعف وينهار لأن الضعف مش نهاية الإنسان الضعف بداية فهمه لنفسه وبداية رجوعه للطريق اللي اتخلق يمشي فيه من غير خوف ولا مجاملة ولا تمثيل وبتعرف كمان إن اللي راح ماكانش 

خير ليك وإن ربنا دايماً بيشيل من طريقك اللي مش هيكمل معاك حتى لو كنت شايفه سند وحتى لو غيابه وجعك أكتر مما يحتمل بشر وإن اللي باقي لك هو أنت هو قلبك اللي رغم كل حاجة لسه قادر يحب ولسه قادر يدي وللدهشة لسه قادر يسامح رغم الخراب اللي حصل فيه على حافة آخر نور بتعرف إنك مش محتاج معجزة علشان تكمل محتاج بس تؤمن إن ربنا ما بيكسرش حد إلا علشان 

يبنيه من جديد وإن الوجع اللي خنقك كان درس واللي هديك كان حماية واللي أخرك كان ترتيب واللي كسر قلبك كان بيدخل فيه نور لسه ما طلعش وفي اللحظة الأخيرة قبل ما يختفي آخر نور هتلاقي نفسك مش خايف بالعكس هتلاقيك مستعد مستعد تواجه ومستعد تبدأ ومستعد تبعد ومستعد تقول لأ ومستعد تسيب اللي بيطفيك ومستعد تختار اللي ينور جواك مهما كان الطريق صعب

على حافة آخر نور هتعرف إن البداية الحقيقية مش في أول خطوة البداية الحقيقية في اللحظة اللي تقرر فيها إنك تستحق نور أقوى من اللي راح وإنك مش جاي الدنيا علشان تتهزم جاي علشان تقوم كل مرة وتنفض روحك وتكمل حتى لو كل حاجة حواليك بتقول كفاية على حافة آخر نور بتبدأ أنت