على حافة الحكمة

بقلم/نشأت البسيوني 

في وقت معين من العمر بتحس إنك واقف على حافة غريبة لا هي نهايات ولا بدايات حاجة كده بين الاتنين مكان مش محدد بس واضح جدا وهادئ بس جواه ضجيج يكفي يهز روحك من جذرها مكان تلاقي نفسك فيه مش بتدور على اللي ضاع ولا بتستعجل اللي جاي انت بس واقف بتبص لجواك بجرأة عمرك ما امتلكتها قبل كده وبتسأل الأسئلة اللي كنت تهرب منها سنين تكتشف إنك 

مش نفس الشخص اللي اتكسر من كام سنة ولا اللي صدق وعود فارغة ولا اللي فضل يوجع نفسه علشان يبان قوي لأ انت بقيت حد مختلف حد اتعلم من كل خيبة وحد اتحرق بما فيه الكفاية لحد ما اتولد منه نور صغير بيلمع في عز الضلمة نور مش باين للناس بس انت شايفه وحاسس بيه وبتعرف إنه أكبر مكسب طلعته من كل الوجع اللي فات وتبدأ تفهم إن الحكمة مش درس 

بيجيلك الحكمة وجع بيعدي عليك ناس بتخرج من حياتك أبواب بتتقفل حاجات كنت شايفها أبدية بتبان إنها مؤقتة جدا وقلوب كنت معتبرها وطن تطلع مجرد محطة وساعتها بتعرف إنك كنت ماشي ورا السراب وإن اللي كنت فاكره أمان كان مجرد هدنة وإن اللي حبيته لحد ما وجع قلبك ما كانش ليك من البداية وتفتكر كل مرة صدقت فيها حد ما يستاهلش وكل مرة خذلت فيها نفسك 

علشان خاطر حد ما فكرش فيك وكل مرة فضلت تعدي على قلبك علشان تكمل ونقطة بعد نقطة تتجمع الحقيقة قدامك إن القوة مش إنك تكمل القوة إنك توقف وتقول كفاية وإن الكرامة مش معركة الكرامة اختيار وإن الحب مش تضحية دايمة الحب راحة قبل أي شيء وتبدأ تتغير مش تغيير فجأة تغير هادي ناضج زي الشجر لما يقرر يوقع ورق قديم ماعدش ينفع يعيش تبقى أقل كلاما وأقل 

غضبا وأقل اندفاعا لكن أكتر صدق وأكتر فهم وأكتر احترام لنفسك وتتوقف عن مطاردة اللي ما يستاهلش وعن شرح نفسك للي ما سمعكش وعن إثبات قيمتك في عيون ناس ما قدروش وجودك وتعرف إن المكان اللي ما يقبلكش ما يلزمكش وإن القلوب اللي تصغر قيمتك ما تستحقكش وإن الخط اللي يوجعك ما هوش طريقك أصلا وعلى الحافة دي الحافة اللي فيها كل الحكايات اللي 

وجعتك وكل الدروس اللي قوتك تلاقي نفسك لأول مرة مش خايف من بكرة لأنك عرفت إنه مش لازم يكون نسخة من امبارح ومش متعلق بحد لأنك فهمت إن اللي بيمشي  بيمشي علشان يفضي مكان لحد أحسن ومش محتاج تثبت ولا تتبرر ولا تستعطف لأنك أخيرا عرفت مين انت وعرفت إنك استاهلت السلام اللي كنت بتدور عليه السلام اللي جاي من جواك مش من حد وتفهم إن 

الحكمة مش نهايات الحكمة بدايات جديدة بتتولد من قلب التعب وإن الوقوف على الحافة مش سقوط الوقوف على الحافة استعداد لطيران وإنك ما ضيعتش عمرك انت بس كنت بتتعلم تمن نفسك وساعتها بس تمسك أول خيط حقيقي يقودك للطريق اللي ليك الطريق اللي طال انتظاره الطريق اللي ماشيه بروح واعية وقلب صادق وإنسان أخيرا فهم نفسه