كتبت ياسمين حافظ.اول مرة تحب ياقلبي

في مسلسل الاسطورة بعيدا عن تجارة المخدرات والاثار والسلاح والبلطجة والفلوس الكتيير خلينا نتكلم شوية عن الحب والرومانسية، في أحداث المسلسل هنلاقي فيها جزء كبير من الواقع الاليم في الحب بمفاهيمه الغلط، اللي اغلبنا فاهمها كده زي ماهي واترسخت عنده خلاص ألا وهي مفهوم الحب الأول زي ماحصل مع ناصر وتمارا، وهي جرحته في الاول وسابته وهو فضل بيحبها برضو بالرغم من كل ده وده واقع وبيحصل فعلا مش كلام مسلسلات ، ده واقع حقيقي ملموس في حياتنا بنعيشه اكيد وانت بتتفرج ع الاحداث دي هتستغرب من حبه ليها اللي فضل عايش جواه بالرغم من انه حب واتجوز واحدة تانية وظلمها كمان معاه بس الحقيقة هو فضل متمسك بحاجة جواه اسمها الحب الاول المفهوم الخاطىء اللي ناس كتير فاهمينه هو ده الحب الحقيقي الصادق الطاهر الحب الفارسي يعني اللي مبني ع احلام الفارس اللي بيحلم يبني احلامه مع فتاة الاحلام الاولي اللي اول واحدة يدقلها قلبه " اول مرة تحب ياقلبي " ونفس الحكاية البنت في بنات كتير بيفضلوا متمسكين بحبهم الاول اللي من وجهة نظرهم الحب الحقيقي الصادق الطاهر اللي كان مبني ع فارس الاحلام اللي اول واحد يدق له قلبهم ويقولوله كلمة " بحبك " ، بالرغم من انه ممكن يكون جرحها وسابها وخدعها بس برضو بتفضل متمسكة بالحب اللي عاش جواها سنين وهو بالمفهوم الخاطىء " الحب الاول " ، للاسف الواقع وتجاربنا الحياتية مع كل اللي حوالينا بتقول ان في الغالب دايما الطرف القوي القاسي اللي بيكون قلبه جامد ويبيع بسرعة هو اللي بيفضل معلم علامة عمرها ما هتتنسي مع تفكير طويل وعميق في العلامة دي بيتحول لحب مرة تانية مع الحب اللي كنت بتحبه اصلا فمن هنا بتوصل لادمان الطرف ده وعشان كده مش بتقدر تنساه فمش ادامك الا خيارين " ياترجعله تاني ، ياتنتقم منه " وفي الحالتين يعني ترجع تتكلم معاه تاني وتشوفه تاني ، يعني في الحالتين بتخسر نفسك وكرامتك وقوتك بذاتك ، فلا تنسي ان الضعفاء ينتقمون والاقوياء يسامحون والاذكياء يتجاهلون ، فتجاهلك هنا ضروري جدا وعلاج صحي لنفسك ولذاتك وكرامتك ولحبك ولقلبك وعواطفك وعقلك ايضا " الانسان هو طبيب نفسه" ، فالحب الاول ليس هو الحب الحقيقي الصادق الطاهر الفارسي فارس الاحلام كما يعتقدونه الكثير والكثير وسقطوا في بئره العميق من المشاكل والتفكير والآلام والاوجاع وتمزيق المشاعر والأحاسيس ، فالحب الحقيقي ياسادة هو الحب الناضج بمفهومه الصحيح الحب المبني ع اسس وقواعد صحيحة هو الامان والحنان والعطف والرحمة والاخلاص والاحترام المتبادل ، هو الحفاظ ع الكرامة والخوف ع المشاعر ومراعاتها ، هو المساعدة وتبادل الاحتياج وتبادل كل المشاعر والكلمات الحلوة الرنانة المرهفة الحساسة الساكنة بداخل القلب والعقل ، فلايوجد حب اول ولا اخير ، فالحب بمفهمومه الصحيح هو الحب الابدي الذي لا ينتهي مع مرور الازمات والسنين هو الحب اللي بتختاره بقلبك قبل عقلك وعقلك قبل قلبك ، هو الحب اللي بيكون معاك فيه ربك ويساعدك فيه وهو الحب اللي يساعدك ازاي تكون راضي ربنا فيه وتكون فعلا انسان ملكش اي مثيل ، اللي يرفعك معنويا وروحانيا وعاطفيا ونفسيا وماديا دي اخر حاجة فيه بس للاسف لازم تكون فيه عشان بس تقدر تزين الحب ده في النهاية ببدلة وفستان وزفة وفرحة كل الناس بي وهو ده الحب الحقيقي اللي كتير مش فاهمينه ولا عارفين ان الحب الحقيقي لا حب اول ولا حب اخير ولا بشكل حلو ولا بكلام جميل ده لي حسابات تانية اوي كتير بس دايما للاسف بنعرف ده بعد ما فات وقت مننا كتير ، الحب مواقف وافعال عشان لو كان من كلام وشكل وإعجاب هتلاقي نفسك في النهاية بتحب كتير ، حب نفسك صح هتعرف تحب وتتحب صح ، قدر ذاتك هتقدر غيرك وتتقدر صح " قدر تتقدر " ، #الحب الاول وعمايله #