لما الهوا

بقلم وليد غنيم
..
..
لما الهوا
قرر يبين قوته ويهزها ببرد الشتا
حسيت مشاعري مشتتة
بين إني احضنها واكسر بردها
او إني
أتأمل جمال لون الورود على خدها
وقتها
حاولت اخبي اللخبطة
بإني أبص علي النجوم
شفت القمر
من غيرته منها راح استخبى ورا الغيوم
ضحكت على حيرتي وخبت وشها
شافنا الزمن قرر يهدي خطوته
ولو لفترة مؤقتة
لما الهوا قرر إنه يهزها ببرد الشتا

لما الهوا فك الضفاير ع الكتاف
بطلت أخاف
حسيت أمان
لما الزمان
هدى الخطا
كل الحقايق لخبطة
حسيت فرج
بعد اما عشت سنين عجاف
لما الهوا قرر إنه يهزها ببرد الشتا
فك الضفاير ع الكتاف

لما الهوا خبط على قلبي إنفتح
حسيت فرح
شفت العيون
مليانة شوق
كل الوجع
جوايا عدى من الشقوق
خلاني افوق
وعرفت إن القرب يشفي اللي إنجرح
لما الهوا قرر إنه يهزها ببرد الشتا
فك الضفاير ع الكتاف
قلبي انفتح والمشكله
كان نور الشمس ضاحى فى الصباح