مـــش هــرجعــــلك

شعر / عبير الجندي.

مـــش هــرجعــــلك

____________________________

مش هرجعلك ..

لو آخر واحد ف الكون ..

مش هرجعلك ،

مهما عيونك تترجانى

فين ما تكون

أيوة محال ،

أرجعلك تانى ...

مهما عيونك تترجانى

يا اللى كسرت بظلمك قلبى

ونسيت طعم هوايا وحبى

مش هرجعلك مش هرجعلك

مهما يكون

عمرى ماهقبل تانى بهجرك ،

وأبقى مجرد لعبة ودور

ولا نبض القلب هيخضعلك

ويكون لك ف الدنيا النور

متهيألك انى بحبك

واللى ف عقلك كله ظنون

مش هرجعلك ... مش هرجعلك

مهما يكون

قلبى اتعلم انه يفارقك ...

فاوعى تصدق نفسك تانى

واعرف انك كنت ف حبك

انسان ظالم طبعه أنانى

فأوعى تصدق انى أرجعلك

واحلم يبقى ما بينا أمانى

مش هرجعلك مش هرجعلك

لو آخر واحد ف الكون

فوق من وهمك واوعى تصدق

انى مصيرى هو مصيرك

فوق من وهمك واوعى تصدق

انى ما هقدر اعيش من غيرك

عمرى ماهخضع يوم واركعلك ..

وللا هستنى تقولى أرجعلك

مش هرجعلك .. مش هرجعلك

مهما يكون

وان جت لحظة دمعة ف عينى ..

هبكى عليا ...

انى ف يوم حسيت بأمانى

اترسمت ليا ..

كانت كل املها حنانك ..

بس خيانتك ، غدرت بيا

يا اللى عشانك قلبى استحمل

ظلمك ليا

مش هرجعلك مش هرجعلك

لو آخر واحد ف الكون

عمر الظلم

مايطرح جوا الحلم زهور ..

عمر الغدر

ما يطرح جوا القلب النور

ابعد عنى وسيبنى ف حالى

كل كلامك مش على بالى

قلبى خلاص ما بقاش مشتقالك ..

مش هرجعلك .. مش هرجعلك

لو آخر واحد ف الكون

============

29 نوفمبر 2020