نقاش بين ميثاق مصطفى بقلم مصطفى سبتة

مصطفى قال
هى إيه هى القضيه
وانتى ليه كده مستحيه
بين عنيكى دمعه حايره
بتنادى ليه دمعة عينيا
سيبى بس دمعى قولى
إيه الحكايه متخافيش
هاتى كل حاجه عندك
بالوضوح ومتدلتش
قالت ميثاق
ياحضرة الجنرال الفضيل
آنا كل ليل مبنامش فيه
كان ذنب قلبي عشان جبان
كان كل حاجه من زمان
ضاعت وفضلت جوا فيه
ساير عليك تحكم عليه
وتسيب حبال المشنقه
عبره ودليل
مبقاش في حيل
أفضل هناك
وأنا كلي بين اربع حيطان
حافظه الحاجات
والممكنات المستحيله تكون مابينا
كان في شئ مبقاش يعينا
وقلبي لسه مش لاقيه
ساير عليك تحكم عليه
رد مصطفى وقال
مين السبب فى اللى راح
والألام ويا والجراح
عايشه ليه جوه سجن كله خوف
قوليلى طيب مين السبب
فى الظروف
لسه أركان القضيه ..
مش باينه ليا
لسه فيه جواكى
حاجه ومتداريه
طب قوى قلبك الضعيف
واحكى قولى ايه الحكايه
لسه الربيع جوانا عايش
ما انتهاش
والخريف لساه ماجاش
احكى بوضوح فى القضيه
قبل حكم الموت ماييجى
على حد كان حقه يعيش
قالت ميثاق
مبقاش له حق
علشان يحن
زي مايكون الف جن
فى كل حته ألاقيه
ورايا
كان كل قصة بميت حكاية
مخبينها ف ظرف بينا
مجراش وراه
أول ماجري الفاس معاه
مسقاش جفون الأرض نور
صبحت ف بور
زي كاسات انين معبي جوا قلبي
زي مايكون مستخبي
لجل مايخبي الفضيحه
يوم ماجه رفض النصيحه
كان بدايته ف ذنب روحي
اول ماكشفت قصته
بانت كاسات المر فيه
ساير عليك تحكم عليه
قال مصطفى خلاص
طاب وانتى ليه
عايزه بإيديكى توئديه
ماتسيبيه
طب وإيه ذنبه الهوى تتنفسيه
وجوه منك تحبسيه
واما خدتى ليه مرادك
بعد حبه تطرديه
المعادله فيها لسهَ
حاجه عايزه تكمليها
قولى يلا ان كنتى حاسه
فيه جواكى حاجه لسه
للعداله عايزه تانى توضحيها
دى قضية جيل بحاله
غرقان فى بحر موجه
جف من سنين
بس وهمه بيأكدله
ان لسه موجه عالى
عايزه ليه طب تدفنيه
وهو روحه لسه فيه
جوه بستان الأمانى
حلمه عايش بين عينيه
كملى بس قولى
لسه عندك فاضل إيه
فعلا ميثاق قالت خلاص
مبقاش يفيد
هو أصلا كان وحيد
ولقاني فرصة تكمله
مبقاش ف حاجة تأمنه
ع اللي باقي جوا مني
مبقاش يعيني
ومفيش مراد ف ثنايا روحي
هي يعني عشان جروحي
عميقة حبه تزودوها
كانو فين لما باعوها
وسابو نزفي كل ليل
ياحضرة القاضي الفضيل
المعادلة من زمان ملهاش حلول
مبقاش ف قول
عشان طرف خالي
مفيش قصادي غير طرف راضي
وطرف تاني بيمنعه
أنا باشهدك
لو ترضي يوم ظلمي ويسعدك
هقبل جنابك طرف شاهد منهم
وارضي بحكم الإعدام لروحي
فدا ليه
ساير عليك تحكم عليه
مصطفى قال ايوه خلاص
مقدرش أءجل فى القضيه
كل شئ واضح تمام
حتى حبل الاشتياق. قطعه الفراق
والرجوع طريقه ضلمه
مش باينله أى نور
بعد المرافعه والدفاع
واللى كان موجود وضاع
وحكايات بكت عينينا
قلبها صعبان علينا
قلوبكوا حاسه وليها سامعه
حتي بين عيونكوا دمعه
مستحيه تشق سكه ع الخدود
كان يجرى إيه لو كل واحد
بين إيديه فى بستانه ورده
بيراعيها
وبيرويها من حنانه
يجنى ليه العطر منها
يقطفه ويروح لغيرها
وبيطالبها تكونله فواحه تمللى
وادى النهايه
أخرة الإهمال وعنده
كارهه قربه
ورافضه تستأنف قرارها للوداد
حاسه إن الراحه ليها فى البعاد
وانا مش لاقى سكه واحده
أقدر أساعده للرجوع
قلبها مكسور أوى
غرقان فى بحر من الدموع
أيها الجمع الحضور
الحكم دا واضح أوى
مش قضيه بين اتنين
دى قضية رأى عام للعاشقين
قبل ما تعضوا الشفايف
صعبان عليكم الضحيه
بصوا قبلا لنفسكم
واللى عايش فى القضيه
يرجع لنفسه بسرعه تانى
قبل ماييجى مكانها هى
والحكم يصدر بالفراق
للأبد من غير رجوع
وتعيش م النهارد بقت حياتك
بالألم ويا الندم كتير موجوع
ومش هايفيد لا الندم ولا الآلام