ياسمين حافظ تكتب .... حكايات وبنعيشها

حكايات وبنعيشها وناس كتير في حياتنا بنشوفها 
 علاقات بتفضل عايشة وعلاقات كتير بنفركشها

احداث بتعدي علينا كتير بتعلمنا 
 واحداث تانية عادية ولا بتأثر فينا

ياما وقعنا وقومنا تاني وياما اتغدر بينا 
بس الاهم اننا منستسلمش لأي جرح يعدي علينا
 ونداوي جراحنا بايدينا ومنستناش حد يواسينا

ده ساعات الجرح بيكون هو سبب وجود القوة فينا 
 الشاطر اللي ياخد منه مناعة وحصانة لسنين طويلة

صدماتنا كتيرة واغلبها مننا فينا
 بعد عشرة سنين بنلاقي ناس كتير اتغيرت حوالينا وناس كمان سبتنا لوحدينا

أحداث رايحة وأحداث جاية وأحداث دايما عايشين فيها 
 بايدينا نبني الفرح ونكبره ونهدم الحزن ونردمه ولانخليه يأكل ابدا فينا

حكايات كتير مؤلمة عايشين فيها و السنين كعادتها بتمر و تجري بينا بس الاهم اننا نتعلم منها ومتعلمش علينا

نبدأ من جديد ونفتح صفحة جديدة من تاني مع نفسينا

ننسى كل ماضي فات ونمسح كل الآهات والذكريات الأليمة