إهداء المرأة

المرأة هي الحب و القدر و القيمة **و أنت كون شريكها وما تعنفاهش
و أحظيها و عاملها بالسياسة ديمة ** و رد بالك عليها و ماتغضبهاش
المرأة هي فخرنا وعزنا وغلانا ** و هي رمزنا و فرحنا دايما و هنانا
وهي أمنا و أختنا وبنتنا ومعانا ** و إذا غابت هي الحياة ما تحلاش
الحياة بلا بيها ما تكونش حلوة ** هي الأمل وهي المثال و القدوة
و هي الدبارة الصالحة و الدعوة ** تضوي على الاركان ما تطفاش
هي كيف الشمعة بنورها ضواية ** تقوم بدورها بالتمام و الكفاية
و معاها يتحقق الهدف و الغاية ** و يتنحى الهم من الدار ما يبقاش
الهم من الدار هي اللي تنحيه ** و إذا غضب منا واحد تحن وترضيه
و كي يعود زاهي تزيد تفرح بيه ** وحنانها ظاهر ظهر ما يخفاش
حنانها ظاهر على الكل ماهو خافي ** بقلبها الطيب مثل العسل الصافي
و هي أصل الجود و الكرم الوافي ** في وقت الحاجة تخُف ما تبطاش
في وقت الحاجة دايما تكون خفيفة ** و في خدمة شغلها صافية و نظيفة
و عزيزة النفس في طبعها وعفيفة ** تفهم على الخزرات من لارماش
هي راهي فاهمة من غير ما تفهمها ** و تعرف الواجب وكل ما يلزمها
و مهما كانت الصعيبة تحب تتعلمها ** و عندها بصمة ثابتة بالانقاش
نطلب الله يثبت نقشها و بصمتها ** و يجازيها على كل شغلها و خدمتها
و يحفظها من الشر و يزيد في قيمتها ** و اليد اللي تمسها بالضر ما تعلاش
عبد القادر رقية / الجزائر