اللحظة اللي مابترجعش

بقلم/نشأت البسيوني 

في حياة كل واحد فينا في لحظة معينة ما نعرفش نمسكها ولا نمنعها ولا نكررها لحظة تيجي كده فجأة كأن الزمن وقف علشان يقدملك درس مكنتش هتفهمه لو اتقال لك بالكلام لحظة بتقلب جواك حاجات عمرك ما كنت فاكر إنها هتتقلب لحظة تسيب أثر في روحك أقوى من أي حدث وأصدق من أي وعد اللحظة اللي مابترجعش مش هي اللي ندمت عليها ولا اللي خسرت فيها ولا اللي 

بكيت بسببها اللحظة دي هي اللي غيرت نظرتك للدنيا كلها هي اللي عرفت فيها مين أنت ومين اللي حواليك ومين اللي كان جنبك بجد ومين اللي كان مجرد ظل ماشي جنب خطواتك من غير روح
في اللحظة دي تلاقي نفسك سايب حاجات كنت ماسك فيها بإيدك ورجلك وتكتشف إنك كنت ماسك سراب وتسيب ناس كنت فاكر إنهم عمود حياتك وتلاقي إن عمودك الحقيقي هو قلبك اللي واقف 

رغم كل اللي مر عليه وتسيب كلام كان بيشدك لتحت وتسمع لأول مرة صوتك الداخلي من غير خوف ومن غير تردد وتتأكد إن في حاجات لما تقع مش المفروض تتشال تاني وفي أبواب لما تتقفل ما ينفعش تتفتح حتى لو كان فيها ذكريات بتحبها لأن اللي وجعك النهارده مش هيمسح وجعه بكرة واللي مكسرك في لحظة مابيرجعش يصلحك بكلمة والغريب إن اللحظة دي رغم إنها بتوجع 

إلا إنها بتخليك ماشي بصلابة غريبة وهدوء عمرك ما جربته قبل كده وتحس إنك لأول مرة فاهم الدنيا من غير ما حد يشرحها وإنك قادر تشوف الحقيقة بدون ضباب وبدون عشم وبدون خوف من الخسارة وفي اللحظة اللي مابترجعش تتحرر من فكرة إنك لازم ترضي الجميع وتتخلص من عادة إنك بتحمل نفسك فوق طاقتها وتعرف إن الكرامة مش بس كلمة الكرامة روح كاملة لو اتكسرت 

اتكسرت أنت قبلها وإن الصمت مش ضعف الصمت قرار الصمت حكمة الصمت حماية وتفضل ماشي بعدها بخطوات هادية بس ثابتة لأنك عرفت خلاص إن اللي جاي محتاج قلب واعي مش قلب تعبان محتاج عقل صافي مش عقل متعلق بأوهام محتاج روح فاضية من الندم ومليانة بالفهم تكتشف إن اللحظة اللي مابترجعش
هي اللحظة اللي بتبني بعدها نفسك من جديد من غير ما ترجع لنسخة زمان ومن غير ما تستنى حد يمسك إيدك لأنك أخيرا عرفت تمسك نفسك