اللواء احمد حجازي ينقذ طفلة من موت محقق

متابعة المهندس أحمد الغمري 

اب سهران بيلعب مع بنته في البلكونة .
فجأة البنت بتصرخ ، ينتفض يشوف ايه اللي حصل ، يلاقي عقرب جنب رجل بنته .
بسرعه ينزل يحاول يدور علي اي مواصله توديه اقرب مستشفي ، وبسبب الحظر مفيش مواصلات ، 
 ياخدها علي كتفه ويجري بيها مش عارف يروح فين.
بعد 500 متر يلاقي كمين ، فيه اللواء احمد حجازي  مدير إدارة الدفاع المدني .
يسأله مالك بتجري ليه،
يقوله بنتي قرصها عقرب ، 
بدون تفكير وبدون تردد ، 
اللواء احمد يأخد الاب والطفلة في عربيته ويجري بيهم علي اقرب مستشفي ، 
للاسف المصل مش موجود فيها .
يروح بيهم المستشفي الجامعي ، برضه للاسف المصل خلصان، يعمل اتصالاته ويعرف ان المصل موجود في مستشفي تانيه بعيده شويه ، فيترك الاب وبنته في المستشفي الجامعي ويروح لوحده المستشفي التانيه يستلم المصل علي مسئوليته الشخصيه ، ويرجع تاني بسرعه ، علشان الطفلة تأخد المصل في وقت قياسي ويتم إنقاذ حياتها بسبب رجولة وشهامة ابن البلد اللي بجد .
تحياتي ليك يا سيادة اللواء ، وأكثر الله من امثالك .