النسر والعنكبوت

كنت زمان متعودة
 أبقى رقيقة خالـص كيوت
كنت فاكرة ترفعي 
عن الصغاير دا قنوت 
كنت بقول كبري واكبري
 دي فتافيت 
انت أكبر من كدا 
انت تربية أصول بيوت
فجأة لقيتها اتبدلت
 واتنططت الهلافيت 
عملوا شبكة عنكبوت
 سمها في القلب موت  
فهموا سكوتي قال إيه ضعف
 قلة حيلة كما الكتكوت
 مكسور جناحي مقدرش أطير
 أو أحلق فوق الشطوط
النسر جارح لو تعرفوا 
ومخالبة فيكم تشوط 
يوم ماييجي يفرد جناحه
 متفكروش في السقوط 
يوم ماييجي  يصيد فريسة
 آخر رجاها صرخة موت 

ياعقول مريضة و عايبة 
بن الأصول شبعان رباية
لكن يوم ما الظرف يحكم  
يقلب حالا مش حكاية 
وقت العوزة يبقي ديب
 أو حية وساعات حداية  
أصله مارد مستكين
 يحكوا عنه 100 رواية
ويقولوا معقول دا هو ؟! 
ايوه هو مع  الدنايا
كنتم فاكرين أدبه ضعف
 وقلة حيلة وشكاية
يالا قابلوا اتحملوا 
 دي ناره غضبها  راية
واللي ولعها وشعلل
 يتصدى لها للنهاية
زي مافي دهب مأصل
 في أصل  جدوره نفاية 

                                                    مايسة إمام