بقلم الشاعر العقيد محمد هيكل....بعد التحية و السلام....

بعد التحية و السلام
وحاجات كتير فات وقتها
.بعد العتاب بعد الملام
كل الكلام بينا انتهى
.
من قلب حبك وبضمير
كنتي انتي داره و سكته
من قلب والله فقير
راس ماله طيبته وسمعته
قرر خلاص يقفل كتاب
مكتوب بحزنه ودمعته
دلوقتي بادئ الانسحاب
و بيطفي عندك شمعته
آخر ما بينا من عتاب
و آخر جواب انا ببعته
.
ماتقلبيش بينا الآهات
سيبي الآهات متخزنه
وماتحسبيش الذكريات
هتصحي حاجة ف قلبي انا
وان كان على العمر اللي فات
سيبي العوض على ربنا
كل اللي بينا حبيبتي مات
و البعد أفضل شيئ لنا
 .

ماترجعيش ليا الصور
ولا أى حاجة انا جبتها
ماترجعيش حاجة خلاص
من أى حاجة انا سبتها
و ده مش مجرد انفعال
دنا كل حاجة حسبتها
أصلي اكتشفت انك بجد
أجمل خساره كسبتها
 .

قلبي اللي عاش بيجملك
مبقاش له بيكي خلاص صله
إحتاجتي حد يكملك
و انا للاسف مش تكمله
خسرتي قلب اتحملك
و بقيتي أكبر مشكله
و انا كل ما آجي اتأملك
تبكي الردود و الاسئله
.
ياواحده كل مافيها باع
وانا اللي عشت اخلص لها
يا أرق مخلوق ف الخداع
راسمه البراءه ف وشها
ياللاه سلام بقى و الوداع
ياأحلى ظالمه عشقتها
ياعمر كان قسوه وضياع
 ودنيا ضلمه كرهتها

.

قلبي اللي مل من العذاب
أهو ساب ل قلبك دنيته
قرر خلاص يقفل كتاب
مكتوب بحزنه ودمعته
دلوقتي بادئ الانسحاب
و بيطفي عندك شمعته
آخر ما بينا من عتاب
و آخر جواب انا ببعته
 .