بقلم العقيد الشاعر محمدهيكل...ام الشهيد...

حمداك يارب
رغم الوجع .. اللي بينزف دم
لكن سامحني لو يخوني الصبر
أصل الحياة لو مات ضنا للأم
وكأنها ... راحت معاه ل القبر
وكأنها ماتت
من غير كفن و لاموت
إبني وحبيبي
الدنيا بيك كات عيد
إبني وحبيبي
العمر بعدك موت
.
عارف ياواد:
من يومك فراقك والكلام
لا عايزه أقوله و لا اسمعه
عمال تجيلى ف المنام
بتدفي قلبي و توجعه
و تشبعه حرمان
ما إنت اللى كنت
ل دنيتي إدمان
صوت البكا
على وش خالك و الجيران
على وش كل اللي شافوك
أو يعرفوك
و اليتم فعيوني أنا
و أختك و أبوك
.
لكن دا يُتْمِي بيك
زلزلني و كاواني
وحاجات كتير بعديك
ليلاتي قتلاني
مابدوقش طعم النوم
بصحى عليك و بقوم
حزن الخلايق كوم
وانا حزني من فرقتك
يا ضنايا كوم تاني
.
وحشاني ريحتك قوي
و منايا لو اشمك
إشتقت يابني قوي
تحضني و أضمك
إشتقت أقلق عليك
و اشيل معاك همك
و ان كانوا كل البشر
حزنوا على دمك
فا اللي انكسر هيه انا
لكن و لايهمك
راضيه قوي ومؤمنه
ما إنت شهيد مصرنا
ودا فخر ليا أنا
إني أكون أمك