لما جيت أكتب

بقلم الشاعر/محسن رجب جودة
لما جيت أكتب عن أمي
لقيتني بكتب عنه أنا
بصيت شمال بصيت يمين
ملقيتش قدامي إلا مين
إلا أنت ..برضو أنت
من ساعتها......
من ساعة لحظة ميلادي
لما أرتبط اسمي ب
اسمك
جوه ف شهادة ميلادي
وتاتا تاتا ورجلي خطت ع البلاطة
وأتشد عودي ويَّا ضهري
لأنك يا أبويا واقف ف ضهري
كنت بتدادي الكبير
كنت بتدادي الصغير
ويوم ما بغلط
كان خصامك هو عقابي
أفضل أنادي وأهتف وأنادي
وأقول سامحني خلاص يا دادي
وأنت عامل إنك خاصمني
قلت خلاص باين عليك متحبنيش
ودموعي نزلت من عينيّا
لأن خصامك غالي عليّا
لقيته قوام يجري بسرعة
وقام حاضني..........
حسيت بلهفة في سكوته وف كلامه
وقام بايسني وقال واحشني
وقاللي بحبك يا ولا
هوه في أغلى ف حياتي م الضنا
ده أنت ضهري
وقت م الدنيا اللئيمة تقطملي ضهري
ده أنت عكازي وسندي
وقت ما الرجلين ما تقدر
تشيلي عضمي ويا لحمي
ما أنت برضو حته مني
....ما أنت لحمي
وأتشد عودي ويّا ضهري
ورفعت قامتي وسط الرجال
رغم إن سنّي سن العيال
............................
وف يوم والفرح مالينا
والناس بكتير حوالينا
كان هنا عمي وخالي
حسيت بوحدة وشعور غريب
بصيت لمكان أبويا
لقيته خالي
جريت بسرعة أدور بسرعة
عن يميني وعن شمالي
احترت تاني واحترت تاني
لأن أمي كانت هنا جنبي ف ثواني
جريت أدور ...أجري وأدور
وأقوم أنادي ..وأهتف وأنادي
وأقول يا أمي وأقول يا دادي
وسمعت صوت أمي الحنون
مليان شجن ..مليان ألم
حتى القمر
تاه فجأة بين الغيوم
قرب يا ابني قرب هنا
إحنا هنا
عرفت بسرعة مكانها
وجريت على طول لمكانها
وشيء من جوه خانقني
ودموعي عماله تفارقني
وقلبي على الأوضة اللي فيها أبويا
بيسابقني
لقيت أهاته م الوجع
ماليا المكان
رغم اللي فيه
بص ليّا
والدموع ماليا عينيه
وكمان عينيا
وقاللي ها وصيك وصية
خلي بالك كتير عليها
قدام عينيك جوه ف عينيك
جوه جوه جوه قلبك
اسمع كلامها واحفظ مقامها
حتى ف كلامك ...حتى ف سكاتك
خد رضاها واسمع دعاها
بتقول يا ربي ..أحفظلي ولدي
خد من حياتي وأدي لولدي
وأشوفه راجل ملو الهدوم
وأعيش لفرحه ...وأشوف عروسته
بدر البدور
وأشيل ولاده... وولاد ولاده
ده ابني حياتي أغلى من ضي العيون
وكام كلمه قالها ليّا وف ثواني
خلي بالك من أخواتك وأمك كمان
وأوعي يابني تآمن لحد
دي الدنيا دي ملهاش أمان
عدت ثواني قليلين
والروح طلعت من سكات ....لرب العالمين
عدت ثواني ...عدت دقايق...عدت ساعات
والدمع ف عينيا ليلاتي ...عمال يبات
وبعد كام يوم من وفاته
بصيت لبيتنا لقيته خالي
طب راح فين عمي وخالي
احتجت ليهم ...مش لاقيهم
أجري هنا ....وأجري هناك
وأروح لعمي وأروح لخالي
وف النهاية مسك الختام
بصيت لمكان أبويا
لقيته خالي.................