الكنيسة بيتنا

تاريخ النشر : الجمعة, أبريل 3, 2020 - 20:40

الكنيسة بيتنا

مش عارف أزاى أبتديها
صورة ولا فى الأحلام
مقدرش طبعا أعديها
لأنها حقيقة مش أفلام

أكتب أيه أنا ولا أيه
مش لاقى كلام أقوله
شايف أنت و هو يا بيه
الحب كله على أصوله

ورى يا أختى لكل العالم
القلب الأبيض عامل أزاى
قولى يالاه لكل بنى أدم
زمن المحبة رايح جااااى

دى مصر ف أجمل صورها
لكن عندنا صور تانية كتير
محبتنا صعب حد يكسرها
أصل اللى بننا و الله كبير

صورة قوية صورة جميلة
م تتشافش فى أى مكان
أهدى لبنات مصر الأصيلة
1000 تحية يا جدعان

تسلم أيدك أنتى و هية
يا أم القلب الصافى حليب
قولتيها لكل الدنيا دية
أن الهلال زى الصليب

يا أم الحجاب ملفوف
ع شعرك و ع راسك
تسلم و الله الكفوف
يسلم و الله أخلاصك

ما هى الكنيسة بيتنا
زيها و الله زى الجامع
هتفضل دايما حبيبتنا
الله عالم و الله سامع

أسمعوا منى يا سادة
الكنيسة دى بيت الله
مفتوحة تملى للعبادة
للتسابيح و للصلاة

هى دى مصر أم الكون
ياللى عايزينها تبقى خراب
مهما هيحصل مهما يكون
مستحيل راح تبقى تراب

كلمات : محمد فتحى

تصنيف المقال :

إضافة تعليق جديد