المطبخ تقدمة صابرين متولى :  الحواوشى بالعجين من مطبخ ايمان حمد

انا شوفت طرق كتير للعجينه اللى بيتعمل بيها الحواوشى لقيت ناس بتعمله بعجينة العشر دقايق او عجينة البيتزا وفى ناس بتحط خميره بس مع احترامى لكل التجارب العجاين دى بتبقى عامله زى الفينو المحشى لحمه ومش بتبقى زى الجاهز اللى بنشتريه من بره

المفروض انك بتعمليه بالعجينه البسيطه ومش بيتحط فيها خميره خالص

ندخل على المقادير

4 كوب دقيق _ معلقة صغيرة ملح _ معلقة صغيرة سكر _مية دافية للعجن

اول حاجة هنحط الدقيق فى الطبق اللى هنعجن فيه ونحط عليه السكر والملح ونقلبهم فى بعض كويس ونبدأ نحط المية الدافية بتاعتنا حبة حبه ونعجن لحد ما العجينة تلف معاكى كويس

وحاولى تعجنى بأقل كمية مية ممكنه عشان العجينة تتظبط معاكى صح هنلف الطبق بقى بكيس بلاستيك وحطيه جوا الفرن عشان العجينة تهدى وترتاح حوالى ساعه او ساعتين

كل ما تسيبيها ترتاح اكتر كل ما تديكى نتيجة افضل فى الفرد

نجهز اللحمة المفرومة بتاعت الحواوشى

نص كيلو لحمة مفرومة وطبعاا يكون فيها دهن شوية مش حمرا كلها _ 5 بصلات متوسطين مبشورين لان الحواوشى بيحب البصل الكتيــــر _ فصين ثوم متقطعين صغير _فلفل اخضر رومى متقطع صغير _ ملح _فلفل اسود _كمون _ كسبرة ناشفة_بهارات لحمة _ طمطمايه مقطعه بس كده

هنا كده اللحمة جاهزة على الحشو

نشوف بقى عجينتنا بعد ما ارتاحت ساعتين وقطعتها كور صغيرة

نفرد بقى كل كورة بالنشابة كويس لحد ما تبقى دايرة بحجم مناسب ونفرش على الرخامة بتاعتنا شوية دقيق الاول

عشان العجينة متلزقش ونحط الحشوة ونقفل العجينة عليها كويس

رصى الكمية بتاعتك فى الصينيه وادهنى الوش بزيت ذرة

الفرن يكون والع وسخن

وتدخليها الفرن وبعد ربع ساعة كده بصى عليها ولو ارضيتها اتحمرت اقلبيها على الوش التانى

وهكذا تابعيها لحد ما تتحمر كويس وتستوى

هتاخد حوالى نص ساعه ل ساعة الا ربع حسب حرارة فرنك

جربوه هيعجبكم اوى ان شاء الله

والف هنا وشفا على قلوبكم يابنات