حبيب الغلابة دكتور صيدلي بدرجة انسان

كتب احمد الغمري

الدكتور محمد نايل , عنده 3 صيدليات لو معاك 10 جنيه والروشته ب 300 تدفع العشرة وتاخد العلاج

وقبل ما تمشي يقولك لو إحتجت حاجه رن عليه في أي وقت

لو فقيرة محتاجه تجهز بنتها يبعتها تختار الأجهزة من محل فلان وفلان يقولها الحساب مدفوع وتؤمري بأي حاجه تانيه

لو مزنوق في قرشين تقدر تميل عليه وتطلبهم وإنت عارف إنه مش هيكسفك

أيتام كتير كان متكفل بهم وأرامل وفقراء وبيته مفتوح للجميع كان الممول الغير معروف لمسابقة حفظ القرآن الكريم بالقرية

كان يقابل الفقير اللي بيشتري علاج بإبتسامة ويحضر له الدواء و يقول له لك خصم 50٪ إجباري، ويبدأ في حلقة من الهزار لكي يطفئ الإحراج عن صاحب الهم .

كنت تروح له عايز علاج ضروري الساعه 3 بالليل وتتأسف بسبب إن الوقت متاخر يرد عليك بإبتسامة قائلا: آسف ليه ده شغلي ربنا سخرني علشان أكون كده في أي وقت أنا تحت أمرك.

و لو الروشته فيها محاليل يقولك ويسألك : فيه محاليل مين هيركب للمريضة المحاليل ؟ فتصمت فيتابع قائلا : هاجي معاك علشان أشرف علي تركيبها، ومكنش بس بيركبها ويمشي بل كان يظل في المنزل حتى انتهاء المحلول بالكامل ويرفض الحصول علي ثمن الروشتة.

قال مرة لارملة فقيرة علم ان لها إبنتان تعالي في المكان الفلاني ولما راحت خدها لمحل تجهيز عرائس وأشترى لها كل مايلزم لإبنتيها كما تكفل بمصاريف النقل ثم رحل وتركها بعد ان أزاح عنها هم تكاليف تجهيز البنتين

رحل الدكتور محمد نايل وبعد رحيله وقفت مسابقة القرآن التي كان يمولها دون ان يعلم احد انه كان الممول لها

بعد صلاة العيد وقف الاطفال يبحثون عن الشنطة التي كانت توزع عليهم فلم يجدوها ليكتشفوا أن من كان يتكفل بها ويشتريها على نفقته لإسعادهم بها صباح كل عيد الدكتور محمد نايل

خرجت قريته شبلنجة التابعة لمركز بنها كاملة والقرى المجاورة لها في جنازة لم تشهد القرية مثيلا لها بعد ان وصل الجثمان إلى قبره والمشيعون من كثرتهم لازالوا امام المسجد

توفى الدكتور محمد يوم الجمعة 2 أغسطس العام الماضي بعد تعرضه لحادث سير على طريق الفيوم الصحراوي،