كيفية التعامل قانونيًا مع أي سب أو قذف على الفيسبوك

بقلم: اللواء أحمد سلامة

في وقت السوشيال ميديا المفتوحة، بقينا عرضة للتشويه، الانتحال، والتجاوز… بس متخليش حد يتجاوز في حقك، وتسكت… في قانون… وفي حق… وفي كرامة مينفعش تتنازل عنها. --- أولًا: لو حد عمل صفحة باسمك أو سرق هويتك يعني أنشأ حساب أو صفحة باسمك، ونشر صورك أو بياناتك، أو حتى قلّدك بأسلوب يوهم الناس إنك أنت! الخطوات القانونية: 1. صوّر الصفحة أو الحساب بالكامل (سكرين شوت). 2. ادخل على أقرب قسم شرطة (أو نيابة الإنترنت)، وقدم بلاغ رسمي بانتحال شخصية. 3. هيتم تحويل البلاغ لـ وحدة مباحث الإنترنت، والنيابة بتحرك القضية ضد صاحب الحساب (من خلال تتبع الـ IP أو رقم الهاتف المرتبط بالحساب). 4. تقدر تتابع البلاغ برقم المحضر. المادة 25 من قانون مكافحة جرائم تقنية المعلومات رقم 175 لسنة 2018، تنص على: "الحبس مدة لا تقل عن 6 أشهر، وغرامة تصل لـ 100 ألف جنيه" لأي شخص ينشئ حساب أو موقع أو صفحة مزيفة بأسماء غيره بقصد الإساءة أو التلاعب بهويتهم. --- ثانيًا: لو حد سبك أو قذفك أو كتب لك تعليق فيه إهانة أو قلة أدب إزاي تتصرف؟ 1. احتفظ بالتعليق أو البوست كامل، وصوّره بصورة واضحة (سكرين شوت ويفضل فيديو للشاشة لو أمكن). 2. متردش بنفس الأسلوب… خليك أرقى منه، وسيب القانون يتكلم. 3. اتوجه على طول لعمل محضر في قسم الشرطة أو في نيابة مكافحة الجرائم الإلكترونية. 4. هيتم فتح تحقيق، وتحريك الدعوى القانونية ضد المتهم، وده اسمه في القانون "سب وقذف إلكتروني". طبقًا للمادة 306 من قانون العقوبات المصري: "كل من قذف غيره يعاقب بالحبس لمدة تصل إلى سنة وغرامة لا تقل عن 5 آلاف جنيه" أما لو السب كان علني أو على منصة عامة زي فيسبوك، فالعقوبة بتزيد. --- نصيحة مني كراجل أمن سابق: متسكتش أبدًا على حقك. اللي بيبدأ بشتيمة، بينتهي بتشويه، وممكن يضر سمعتك وشغلك وأهلك. احتفظ دايمًا بأي دليل… لقطة شاشة، رابط، رقم هاتف، أو حتى شاهد. خلي خطواتك قانونية، ومتردش بالإهانة، لأن ده يخليك شريك. وخد بالك… الناس بتنسى، لكن المحاضر ما بتنساش. ---

ختامًا:

السوشيال مش غابة… والدولة عاملة قانون مخصوص عشان تحميك. ما تفرطش في اسمك، ولا تسيب كرامتك على كيبورد حد تافه. لو تعرضت للإهانة أو الانتحال… اتكلم… خليك واثق… خليك قانوني. #بقلمي

#أحمد_سلامة

#الكرامة_مش_رأي