خايفة...بقلم ياسمين حافظ

خايفة و ايه اللي مخوفني مش قادرة أقول

جوايا خوف وغضب ومخنوقة ومش عارفة أثور

زعلانة ومش طايقة وحاسة إني عايشة في عالم ملعون

أزعل على اللعنة اللي صابت القلوب ولا الغفلة اللي تاهت فيها العقول !!

أزعل على الصح اللي اتشقلب ومبقاش موجود

أزعل على الحق اللي اتبهدل وصوته بقى مكتوم

ولا على الغلط اللي بقى غالب مش مغلوب

ولا على الرحمة اللي قربت تنقرض من تاريخ الوجود

ولا على اللي يكون إنسان بجد يتقال عليه مجنون

شوفت كتير وقليل والدنيا عمالة تلف وتدور

شوفت ناس كتير تايهين ضايعين في الهموم

حاسة بتقل في قلبي اكني شايلة جبل كبير من هموم

شايفة الدنيا من بلاويها بقت غيوم

حاجات كتير بتحصل حواليا بتثبتلي خوفي

بقول من جوا نفسي يمكن ده خوف عادي بيحصل ولا خوف فضولي

لكني دايما ألاقي الناس بتثبتلي ظنوني

وكل ما أحاول أهرب و أداري .. أرجع تاني بخوفي وهمومي

ما أنا ملاقتش حل تاني .. كل مرة تزيدوا خوفي

كل مرة ألاقي الأيام معانداني .. وبرضو تقولي قومي فوقي

شوفي الدنيا من حواليكي اتغيرت و مبقاش في حاجة جاية تطمنك

ولسه بعافر وبرضو أهرب و أداري وأرجع اكدب ظنوني

وأقول مسيري أوصل لطريق نور مبني من ربي الكريم ويكون مصيري في حياتي جميل

ولسه هعافر و هعافر وأقول هوصل لطريق الأمان وهو أكيد بدايته ونهايته بايد الرحمن

فهو الوحيد القادر على كل شىء .. في غمضة عين يغير ويبدل كل الأحوال