يا حب ليه كداب بقلم مصطفى سبتة

شَدّتني غرقت في بحورها
أنا أصلي ماليش في الصد
قلبي ضعيف في الحب
ولو ها نعد نتوه في العد
سمره حبيت شقرا حبيت
وعشت الوهم من غير حد
أتاري التوها وخداني
دا حتى الحضن كان ود
قلوب معدومة الإحساس
قلوب بتدق ع الطبله
قلوب بتدق ع المزمار
وقلوب في الدنيا دي هبله
دورها تحس وتصدق
وترسم قصه مش عقله
في عصر مخاصم الإحساس
لا عنتر فيه ولا عبله
كله كان حاضن كلي
وخده نام على خدي
أثاث الغرفه كان برقص
وقولت لنفسي مين أدي
حضنه بجد كان صادق
ودمعه ما قدرش يهدي
مَسحت دموعه بلساني
أتاري اللقطه بتعدي
أخيراً فهمت خلاص
إحساسي رخيص بنداس
وكلمة بحبَك وكلمة بحبِك
خنجر في أيد الناس
شيطان ع الأرض ماشي
بيوسوس كما الخناس
كلمه لكسر القلوب
بتحلي السم في الكاس
كلمه رخيصه ملعونه
لا يمكن تاني أكررها
لا ليها حبيب ولا ديانه
وجرحت كل من قالها
الكل كليله غناها
وداق الكل علقمها
وصفي أنا جمر جهنم
حاجه بسيطه من نارها
متصدقهيش
وأنت كمان متصدقهاش
دي كلمه رخيصه
متوفره على أي رصيف
بس ها تدفع جرحك كاش
مش محتاجه أوراق مختومه
ولا رشوه دا سعرها ببلاش
المطلوب في الحال ومقدم
جرح ودمع وقطن وشاش
يا حب ليه كداب
يا جنه في هواها عذاب
يا حلم كبير بنسعى له
ونوصلّه نلاقي سراب
يا جنينه وكلها صبار
مش حاويه غير تعابين وذئاب
يا صحرا جوّاها حامي
خضارها بتحول غاب
يا حب ليه كداب