إهدار الكرامة مابين الشخص والمجتمع

بقلمي جمال القاضي
( بدون فصحى )

في زمان صرنا نعيش فيه أزمة اخلاق وأسوأ فترة يمكن ان نتعرض لها  من عدم تقدير لآدميتنا كبشر هي تلك التي نعاصرها، وليس هناك  لوم الا على انفسنا، والسبب ان كل واحد فينا اتنازل بمحض ارادته عن كرامته بسهولة، اما من اجل المال او من أجل الشهرة او من أجل النساء والركد وراء الشهوات والغرائز

مظاهر الإهانة لأنفسنا ولآدميتنا كتير، زي انك تتهان من غيرك ورغم كده تفضل شايف وسامع ورغم كده تفضل صامت، زي ان سيده بمجرد ابتسامتها  لشاب خلاص كل شيء مهم في حياته دونها يتنازل عنه بسهولة، زي ان لو الزوجة أمرت زوجها بإهانة امه أو ابوه مفيش مشكله ساعتها طوع أمرها، زي انك بترضى بأقل شيء رغم انك تستحق اكتر منه، زي انك بتتصالح في كل مره تتهان فيها او يتغلط فيك بكلمة معلش وبعدها يتكرر نفس الموقف من الإهانة 

عادتنا زمان اصبحت في حاضرنا لمن يتمسك بيها شيء عار ومتخلف ورجعي، زي  احترام الصغير للكبير او الابن لابوه وكلها كانت زمان وانتهى خلاص، كمان من مظاهر الإهانة عدم الاحترام مابين أفراد الأسرة وتشوف الابن بيفتخر انه بيدخن سيجارة أمام والده بالإضافة لان الاب بيطلب من ابنه كمان انه  يشتري له الكيف على حساب الابن ويمكن كمان يعطيه السيجارة وسط الضيوف وشيء عادي مفيش مشكله

زي الابنه او المرأة الجارة لما الشباب يضايقها ف الرايحه والجايه غير انه ممكن يطمع في زوجة غيره المسافر او الأرملة او المطلقة وسط غياب الأمان او الضمير ومفيش مشكله لان الأخلاق والضمير والدين عند الشخص ال بيعمل كده في اجازه

كل ده اسباب خاصة بكل شخص لإهانته وإهانة كرامته
لكن فيه اسباب للإهانه ولها علاقة بالمجتمع ومؤسساته وكتير منها كل يوم نسمع ونشوف الوان منها، زي ظهور المسئؤل في زيارة واهانته لمسئول أصغر منه او مدرس او موظف بس علشان غيره يعرف انه بيتابع ويشوف الأحوال الوظيفية  بنفسه

زي كمان وسائل الإعلام ال كانت السبب في اهانة المدرس أمام المجتمع وظهوره في الأفلام والمسلسلات بشكل مهين لكرامته وغير لائق لمهنته الراقية وكمان اهانته من أولياء الأمور او الطلبة نفسهم

زي موظف من مهام وظيفته الأساسية انه من واجبه يقضي حوائج الناس مقابل مرتب يتقاضاه من الدوله وهو ولا بيهتم لطابور طويل واقف امامه ويتلذذ في تعذيبهم بالشكل ده رغم ان فيهم مسن ومريض واطفال وستات ولا في دماغه وأهم شيء يفطر او يشرب الشاي وخلاص، بالإضافة للاهانه والسب للمواطن من الموظف وممكن المواطن يكون في سن والده او اكبر

كلنا كنا السبب في اهانة كرامتنا بشكل مباشر او غير مباشر والسبب في كده هو التخلي عن اجمل العادات والمبادئ والتقاليد ال ورثناها من أجدادنا والصورة  اكيد تفكرنا بالماضي للأشخاص ال لسه عندها بعض من الذكريات عن  الماضي في اذهانها