رشا فؤاد تكتب : المصرى يموت ويقول مااعرفش

بقلم : رشا فؤاد

كونك مصرى فده كفيل إنك تحصل على لقب "فتاى" ماشاء الله شعب عنده جينات نادرة مش موجودة عند أى شعب تانى .

مين فينا ماسألش وهو راكب عربيته حد على عنوان مكان وحظه المنيل وقعه مع واحد فتاى وفضل يلففه حوالين نفسه السبع دوخات وتوهه ؟!

الله!! بقى لو حظك خدمك وجربت تسأل عسكرى المرور تبقى الست الحاجة داعيه لك !!

إفتكرت بالمناسبة دى موقف ،كنت واقفه فى إشارة وكان فيه قدامنا شاشة العرض الكبيرة  الخاصه بالإعلانات اللى  بتتغير الشاشة  كل نص دقيقة أوتوماتيك، فكان ولد وباباه فى العربيه اللى جنبى فالولد سأل والده هى إزاى بتتغير كده لوحدها؟! باباه إشترى دماغه و رد قاله فيه واحد مستخبى ورا الشاشه بيغيرها كل شوية !! هههه

معقول بقى صعب علينا نقول ما نعرفش ؟!

من قال الله أعلم فقد أفتى الا الشعب المصرى واخدها مسألة كرامة وبيحس إنها عيبه كبيرة جدا فى حقه لو قال ماأعرفش

قلما تجد شخص متواضع يقول ماأعرفش لما تسأله عن شئ

وتحس إنها عيبه كبيرة وأصبحت مسألة سمعه !!!

يعنى بزمتك ترضى لأخوك يقوله عليه مش عارف  !! هههههه

 علشان كده أصبحنا أكتر شعب يموت فى الهرى حتى على صفحات التواصل الإجتماعى وبقى عندنا عدد مهول من الخبراء إيشى  إستراتيجيين وأمنيين ،والمحللين السياسين المتفزلكين الفتايين ماشاء الله ماليين الدنيا فتى فى كل القنوات

يبقى جت على المواطن  الغلبان اللى فى الشارع مش هيفتى هو كمان !!

فعلا المصرى يمووووت ويقول ماأعرفش !! بس بجد أنا نفسى أفهم إحنا كده ليه بس ماأعرفش !!