قول يارب

* ** * ** * ** * ** * ** * ** *
يقولها / محمود جنـــيدى 
* * ** * ** * ** * ** *
أمّا تلاقى الدنيا ضاقت فى خلقتك .. 
واما تلاقى عنيك بخلانة بدمعتك .. 
واما تلاقى شفايفك نسيت بسمتك .. 
وتحس رجليك مابتوصّلش خطوتك .. 
قول يارب ..
**********
أما تلاقى الفجر مش راضى يطلع .. 
واما بطنك مش قادرة باللقمة تشبع .. 
والآه من غير ماتقولها نارها يتوجع .. 
وتصلّى ماتعرفش ساجد والا بتركع .. 
قول يارب ..
**********
أما الكلمة تنحسب عليك وغيرك لأ .. 
أما تلاقى الحق كدب والكدب حق .. 
واما تكون خربان ومتمشيش إلا زق .. 
واما الأب ينادى ابنه والولد يرد بلأ ..
قول يارب ..
**********
بس حاقولك كلمتين اسمعهم منى وقوم ..
لا الفرح دايم والله أبدا ولا دايمة الهموم ..
المكتوب مكتوب بس نرضى بالمقسوم ..
فسلّم أمرك لمدبّر الأمر الواحد القيوم ..
وقول يارب ..
**********
ربك اما يحب عبده ببتليه عشان محبوب ..
واللى بيستغفره بيغفرله الخطايا والذنوب ..
وفاتح باب التوبة وبيقبلها من اللى يتوب ..
فارفع إيدك ادعى وانت راضى بالمكتوب ..
وقول ياااااارب ..
**************
6 مارس 2019