هتوحشتيني يا فاطمه

بقلم
صموئيل نبيل اديب

هتوحشتيني  يا فاطمه

عمرك شفت حد دخل الفن "عافية" وبالصدفة ؟..
خليني أحكيلك قصة الحاجة فاطمة كشري اللي مكنتش مجرد ممثلة، دي كانت حتة من شارعنا ومن بيوتنا..

الحاجة فاطمة ابتدت التمثيل بالصدفة ككومبارس صامت في فيلم (صراع الأحفاد) سنة 1989، كانوا بيمثلوا في الشارع و هي عدت عليهم و قالت خدوني كومبارس معاكم  و قد كان.. و اشتهرت بدور المعلمه وبنت البلد الطيبة احيانا و الشريرة احيانا،  و هي عرفت تلعب الأدوار دي كويس لأنها  هي فعلاً صاحبة عربية كشري في قلب شبرا، والسكينة اللي كانت بتمسكها في الفيلم هي نفسها اللي بتقطع بيها بصل التقلية في المحل!

 يمكن ظهورها الأشهر كان  في الحملة الدعائية الشهيرة لقنوات ميلودي  وحققت من خلالها شهرة واسعة  و كمان فى «أحلى الأوقات، سجن النسا، عريس من جهة أمنية، خالتي فرنسا»،

و كلنا ضحكنا علي مشهدها الأسطوري في مسلسل نيللي و شريهان مع (ايمي و دنيا سمير غانم)  في السجن و هي عاملة فيها سوبر ماركت متحرك في مشهد أسطوري يخليك تضحك من قلبك على خفة دم فطرية مفيهاش ذرة تصنع..

بس يا عيني، الضحكة دي كان وراها وجع ميتوصفش.. فاطمه عانت كتير في حياتها بسبب الإخطاء الطبيه ، مره  كان عندها  من فتق في البطن، عملت العمليه و طلعت تعبانه جدا رجعت بعدها المستشفى علشان تكتشف أن الدكتور نسي شاش طبي في بطنها  و و لأن العملية كانت صعبة  فهي  إرسلت نداء استغاثة للرئيس عبدالفتاح السيسي ،  اللي امر علاجها ضمن مستشفيات الشفاء  وطلعت سعيدة و مبسوطه 

من المآسي في حياتها ان مرة فاطمة كشري قالت مع إنجي هشام، في برنامجها المنسي، على قناة هي: جوزها ضربها  كتير لدرجة كسر ايديها في مرة و اتجبست ، و بالرغم من كده فضلت اصيله معاه معاه 37 سنة لغاية ما توفى وهو عنده 61 سنة.

النهارده  كانت  آخر مرة فاطمة تروح فيها مستشفى علشان هي خلاص ماتت  وصلاة الجنازة إن شاء الله بعد صلاة الظهر  يوم الاثنين  بمسجد الشهداء ميدان احمد حلمي شبرا مصر

الله يرحمها ويغفر لها ويثيبها جزاء بما صبرت