وقفة مع النفس العلاقة التي لم تقصرفيها... لاتندم عليها

بقلم اللواء / أحمد سلامة

في علاقاتنا، سواء كانت صداقة أو حب أو حتى زمالة... ساعات بنتعب وندّي من قلبنا، نبذل مجهود، نتحمّل، نغفر، ونصبر... وكل ده عشان نحافظ على حاجة شايفين إنها تستاهل. لكن أوقات، رغم كل ده، العلاقة دي بتنتهي... وبتسيب وجع.

وهنا لازم نقف وقفة صدق مع نفسنا:

ما تزعلش على علاقة انتَ ما قصّرتش فيها.
ما تبكيش على شخص كنت دايمًا معاه على قدر المسؤولية، وكنت نضيف في كل تصرف.

اللي تزعل عليه بجد هو تعبك اللي راح...
مشاعرك اللي استُهلكت...
أيامك اللي اتسرقت...
بس حتى الزعل ده لازم يكون ليه وقت وحدود. لأنك ما كنتش غلطان، واللي يسيبك وهو شايفك بتبذل كل ده، هو اللي خسر... مش إنت.

خد وقتك، زعل زي ما تحب، يومين تلاتة...
لكن بعدها، ارجع واقف صالب طولك، وارمي العلاقة دي ورا ضهرك.
لأنك ببساطة... تستحق علاقة تحترم اللي بتقدّمه، مش علاقة تستهلكك وترميك.

عمرك واحد، متعيشهش في حزن على اللي ما استاهلكش.
خلي دايمًا عندك يقين إن اللي راح مش خيرك، وإن اللي جاي بإذن الله أحسن وأصدق.

بقلمي
اللواء_أحمد_سلامة